早兩日係細仔浩浩滿月, 襯我仍記得今次生產既過程, 先寫低落黎, 唔係將來怕好快就會忘記的了.
醫生原本約左我11月26日朝早上山頂開刀的, 點知係11月22日朝早4點幾大囡突然起身嘈醒左我, 我咪順手去個廁所囉! 見到有啡之餘, 個肚有少少似M黎既痛. 為免有咩問題, 我咪叫老公同我上山頂CHECK好些囉!
因為怕工人未睇得掂大囡, 晨早留留CALL左老媽子黎睇大囡, 大約5點半我就同老公出門了.
事關我覺得應該未有咁快生得, 咪自以為醒目咁去左雀仔園食早晨, 因為大早既關係, 只得一檔飲茶既舖頭仔開緊, 老公叫左排骨飯食, 我就求其咁叫左個糯米雞食, 點知我食左呢隻糯米雞就出事啦!
我地6點去到山頂, 姑娘同我CHECK完後, 話見我有宮縮, 應該要入院, 我都鄂然, 雖然醫生好似同姑娘有少少唔同既意見咁, 但最終我都要入.
姑娘叫除晒所有野比老公攞走後, 8點幾入左產房, 9點幾有醫生黎問左我情況後, 就開始丙Q完又再丙我. 唉.......
咪因為個隻糯米雞囉! 醫生話, 我明知自已係高危, 入得院就唔好食野啦! 還要食隻咁難消化咁糯米雞, 開刀前8個鐘唔食野黎開刀係最安全的, 若果唔係食左野, 會即時同我開刀做手術的了.
SO.....我唯有係產房等到2點幾, 醫生先同我開刀. 係等待既呢段期間, 我宮縮都開始越黎越密, 痛楚也開始明顯了, 但子宮仍未開囉!
到2點半左右, 姑娘已經開始為我開刀做準備, 我個心都開始緊張, 我一直都以為, 一年前我都係咁開刀, 有經驗嫁啦! 應該唔會咁緊張的. 點知原來唔係的, 係會更加緊張.
推到入同一間既手術室, 就覺得冷氣好凍, 等麻醉師黎既時間, 我心諗上一胎炘炘係3點半左右出世的, 個時係3點鬆少少, 心諗可能兩姐弟出世既時間會一樣呢! 可惜又唔係....
麻醉師一到, 又好似上一胎咁, 姑娘叫我盡量好似蝦咁屈埋, 等麻醉師容易些去摸骨節位同我打麻醉針, 但麻醉師話摸唔到我骨節位, 只可以估計呢打針....my god.... 結果係我背脊打左3次, 先成功打到麻醉針. 真係痛死我.....對將來我既腰骨都唔知有冇影響添嫁!
一成功打完麻醉針, 唔夠一分鐘, 我雙腳開始麻, 開始無感覺, 而醫生已經開始擋開我個肚了, 點解我知? 因為我聽到好似燒"寒"既聲. 無耐我開始feel到醫生係我個肚內拉來拉去, 又扯來扯去, 好似推野頂到我個肺咁, 唔知係咪麻醉藥打既位置唔多準呢? 醫生係我個肚度既拉扯, 我都感覺到幾清楚呢! 相反上一胎開刀時就無咩感覺.
我諗大約十幾分鐘後, 我就聽到bb喊聲, 細佬出左世啦! 姑娘係咁話bb好得意喎! 我都想快些睇下係咪咁得意, 等到姑娘同佢抺乾淨後比我一睇, 細佬同家姐一樣, 剛剛出世既樣都好似樣喎! 姑娘個時講埋, 係仔仔, 重2.88kg.
個麻醉師係我做開刀時, 得閒就問下我有冇咩唔舒服? 到後段時, 麻醉師走開左, 我就突然覺得心口(心臟位置) 好似有野壓住我咁, 開始難呼吸...當時我有些驚...唔係有咩併發症呀? 咪call返個麻醉師返黎問...好彩佢話, 因為同我打左加快子宮收縮既針, 我既反應係正常的. ...呵呵! 咁我都安心些...
係做完手術後, 一出手術室後, 就見到老公, 我問佢睇左bb未? 佢答我: " 睇左啦! 醜樣過家姐好多喎!" 我心諗: "shit!!!"
我依舊要觀察一小時, 無咩事後就可以推上產後病房. 上到病房, 我個心開始驚.. 因為上一胎開刀麻醉過後既痛係幾攞命的...我個心一直擔心緊.
不過又好彩, 原來今次開刀, 麻醉師同我打多一支叫陣痛針(個名唔知有冇記錯), 話傷口無咁痛的, 結果, 確實如此, 雖然傷口都會痛, 但同上一胎對比, 簡直係小毛見大毛, 我可以比較輕鬆咁側身去試餵人奶, 比較輕鬆咁落地, 真係好...thanks!
留言列表
